MAAFISA WA DRC WAWASILI NCHINI KUJIFUNZA SHUGHULI ZA TASAF.

User Rating: 0 / 5

Star InactiveStar InactiveStar InactiveStar InactiveStar Inactive

Ujumbe wa Maafisa kutoka Jamhuri ya Kidemokrasi ya Kongo-DRC- umewasili nchini kwa ziara ya siku 10 kujifunza namna Serikali ya Tanzania kupitia Mfuko wa Maendeleo ya jamii –TASAF ilivyofanikiwa kutekeleza Mpango wa Kunusuru Kaya Maskini-PSSN.

Akiwakaribisha Maafisa hao kwenye Ofisi ndogo za TASAF jijini Dar es Salaam, Mkurugenzi Mtendaji wa Mfuko huo Bwana Ladislaus Mwamanga amebainisha hatua mbalimbali zilizochangia kufanikiwa kwa Mpango huo wa Kunusuru Kaya Maskini unaohudumia Zaidi ya Kaya Milioni MOJA NA LAKI MOJA nchini kote.

Bwana Mwamanga amesema mafanikio yaliyopatikana katika utekelezaji wa shughuli za Mfuko huo yametokana na ushirikishwaji wa jamii huku akisema mchango wa Serikali ya Tanzania na Wadau mbalimbali za Maendeleo umechangia kwa kiwango kikubwa kufanikisha Mpango huo wa aina yake kupata kutekelezwa nchini.

Mkurugenzi Mtendaji huyo wa TASAF amewaambia Maafisa hao kutoka DRC kuwa Mfuko huo tangu kuanzishwa kwake umejikita zaidi katika kuboresha huduma za kijamii hususani katika sekta za elimu, afya,maji,mazingira,na kuhamasisha walengwa kuanzisha shughuli za uzalishaji mali ili waweze kukuza uchumi na kupunguza umaskini.

Kwa upande wake kiongozi wa ujumbe huo bwana Ruphin Kimuemue Bo- Elongo amesema lengo la ziara hiyo ni kujifunza namna serikali ya Tanzania kupitia TASAF ilivyofanikiwa kuwahudumia wananchi hususani wanaoishi katika hali ya umaskini .

Amesema wamevutiwa na mafanikio ambayo TASAF imeyapata katika utekelezaji wa Mpango wa Kunusuru Kaya Maskini ambao wamesema utaisaidia pia DRC kutokana na kuwa na wananchi wake wengi wanaishi katika adha ya umaskini.

Ukiwa katika ofisi za TASAF ujumbe huo umepata fursa ya kufahamishwa utekelezwaji wa shughuli za taasisi hiyo zikiwemo za Ajira za Muda ,Uhawilishaji Fedha, na Uwekaji wa Akiba kwa Walengwa wa Mpango wa Kunusuru Kaya Maskini.

Maafisa hao kutoka Jamhuri ya Kidemokrasi ya Kongo pia watatembelea wilaya ya Kibaha mkoani Pwani ,Temeke na Zanzibar ambako watakutana na Walengwa wa Mpango wa Kunusuru Kaya Maskini na kujionea namna wanavyonufaika na huduma za Mfuko wa Maendeleo ya Jamii –TASAF.

 pic1

Ujumbe kutoka DRC ukimsikiliza Mkurugenzi Mtendaji wa TASAF,(anayeitazama kamera) kwenye ukumbi wa ofisi ndogo ya TASAF jijini DSM.

pic2

pic3

Mkurgenzi Mtendaji wa TASAF,Bw. Ladislaus Mwamanga (wa tatu kulia ) akiwa katika picha ya pamoja na ujumbe kutoka DRC ambao uko nchini kujifunza shughuli za huduma ya hifadhi ya jamii

 

DR.MARY MWANJELWA AVUTIWA NA MPANGO WA KUNUSURU KAYA MASKINI UNAOTEKELEZWA NA TASAF.

User Rating: 0 / 5

Star InactiveStar InactiveStar InactiveStar InactiveStar Inactive

Naibu Waziri Ofisi ya Rais Menejimenti ya Utumishi wa Umma na Utawala Bora ,Dr. Mary Mwanjelwa ameuagiza Mfuko wa Maendeleo ya Jamii-TASAF kuendelea na Utaratibu bora zaidi wa kufuatilia kwa karibu utekelezaji wa shughuli za Mpango wa Kunusuru Kaya Maskini ili Wananchi waweze kunufaika na Mpango huo ulioanzishwa na kutekelezwa na Serikali.

Dr. Mwanjelwa ametoa agizo hilo alipokutana na Menejimenti na Watumishi wa Mfuko huo akiwa katika ziara yake ya kikazi na kujitambulisha kufuatia uteuzi uliofanywa na Rais Dr. John Magufuli hivi karibuni ambapo Naibu Waziri huyo alihamishiwa katika Wizara hiyo.

Naibu Waziri huyo amesema pamoja na mafanikio makubwa ambayo Mfuko huo umeyapata katika kuhudumia takribani Kaya Milioni Moja na Laki Moja za Wananchi wanaoishi katika umaskini, haupaswi kubweteka kwani suala la kupambana na Umaskini ni agenda muhimu katika Mipango ya Serikali ambayo pia imeainishwa kupitia ilani ya Uchaguzi ya Chama cha Mapinduzi.

Aidha Dr.Mwanjelwa ameagiza Watumishi wa TASAF kuwa Wabunifu na kufanya kazi kwa karibu zaidi na Wananchi hususani walioko katika Mpango ili Matokeo ya utekelezaji wa Shughuli za miradi yawe endelevu na yanayopimika ili hatimaye kero ya umaskini miongoni mwa Wananchi iweze kupunguzwa kama siyo kumalizika kabisa.

Akizungumzia utekelezaji wa shughuli za Miradi ya Ajira ya Muda, Naibu Waziri huyo wa Ofisi ya Rais Menejimenti ya Utumishi wa Umma na Utawala Bora ameagiza TASAF kuhakikisha kuwa miradi inayotekelezwa kupitia utaratibu huo ni ile inayowanufaisha wananchi na malipo yafanywe kwa kuzingatia kanuni na taratibu za Serikali.

Wakati huo huo Dr. Mwanjelwa ametoa rai kwa halmashauri za wilaya kusimamia kwa karibu miradi inayotekelezwa na TASAF kwenye maeneo yao na kuonya kuwa pale ambapo itadhihirika kuwa halmashauri inakiuka taratibu wa miradi hiyo hatua zitachukuliwa haraka iwezekanavyo dhidi ya wahusika .

Akitoa taarifa ya Utekelezaji wa Shughuli, Mkurugenzi Mtendaji wa TASAF ,Bwana Ladislaus Mwamanga amesema Mfuko huo umeendelea kutekeleza Maagizo ya Serikali ya kusaidia jitihada za Serikali katika kupambana na Umaskini nchini kote .

Bwana Mwamanga amezitaja sekta za Elimu, Maji,Afya ,Barabara,hifadhi ya Mazingira, Mifugo, Kilimo na uzalishaji mali na ujenzi wa rasilimali watu kuwa miongoni mwa maeneo yaliyopewa kipaumbele tangu kuanzishwa kwa Mfuko huo takribani miaka 20 iliyopita miradi ambayo amesema imetekelezwa kwa mafanikio makubwa kwa kuwahusisha wananchi kwenye maeneo yao.

Mkurugenzi Mtendaji huyo wa TASAF amebainisha pia kuwa utekelezaji wa Mpango wa Kunusuru Kaya Maskini licha ya changamoto kadhaa zilizotokana na ukubwa wa Mpango huo kumekuwa na mafanikio makubwa hususani katika kubadili fikra za Walengwa ambao kwa sasa wanaendelea kuboresha maisha yao kwa kutumia huduma za Mpango huo.Amesema maboresho muhimu yatafanywa kwa kuzingatia maelekezo ya Serikali ili katika sehemu ya pili ya Mpango inayotarajiwa kuanza hivi karibuni kuwa na ufanisi zaidi ikiwa ni pamoja na kuyafikia maeneo ambayo hayakupata fursa hiyo katika awamu ya kwanza.

pic1

Naibu Waziri Ofisi ya Rais Menejimenti ya Utumishi wa Umma na Utawala Bora Dr. Mary Mwanjelwa(aliyeshika kipaza sauti) akizungumza na Watumishi wa TASAF (hawapo pichani) kushoto kwake ni Mkurugenzi Mtendaji wa TASAF Bwana Ladislaus Mwamanga.

pic2

Mkurugenzi Mtendaji wa TASAF,Bw. Ladislaus Mwamanga (aliyesimama) akitoa taarifa kwa Naibu Waziri Dr. Mary Mwanjelwa wakati alipofanya ziara ya utambulisho kwa watumishi wa taasisi hiyo.

pic3

Picha ya Juu na Chini baadhi ya Watumishi wa TASAF wakimsikiliza Naibu Waziri wa Ofisi ya Rais Menejimenti ya Utumishi wa Umma na Utawala Bora Dr. Mary Mwanjelwa (hayupo pichani) ambaye alifanya ziara katika taasisi hiyo.

 pic4

pic5

Naibu Waziri Ofisi ya Rais Menejimenti ya Utumishi wa Umma na Utawala Bora Dr. Mary Mwanjelwa (aliyeketi katikati ) akiwa katika picha ya pamoja na baadhi ya Watumishi wa TASAF alipofanya ziara ya kujitambulisha .

MKUTANO KAZI BAINA YA WADAU WA MAENDELEO, MAAFISA WA SERIKALI NA WATENDAJI WA TASAF WAMALIZIKA KWA MAFANIKIO JIJINI DAR ES SALAAM

User Rating: 0 / 5

Star InactiveStar InactiveStar InactiveStar InactiveStar Inactive

Mkutano wa Wadau wa Maendeleo ,Maafisa wa Serikali na Watendaji wa Mfuko wa Maendeleo ya Jamii-TASAF uliojadili kwa kina utekelezaji wa Mpango wa Kunusuru Kaya Maskini ambao unatekelezwa na Serikali kupitia TASAF umemalizika jijini Dar es Salaam.

Mkutano huo ambao hufanyika kila baada ya miezi sita , umefanyika kufuatia ziara ya washiriki hao katika wilaya ya Misungwi mkoani Mwanza na Unguja ambako walikutana na Walengwa wa Mpango huo na kujionea namna Walengwa wanavyoendelea kunufaika na huduma zinazotolewa na Mpango huo kuboresha maisha yao.

Miongoni mwa mambo yaliyofanywa katika mkutano huo ni pamoja na kuweka mkakati wa utekelezaji wa awamu ya pili ya Mpangowa Kunusuru Kaya Maskini inayotarajiwa kuanza Mwezi Aprili hapo mwakani ambayo italenga zaidi katika kuwashirikisha Walengwa kufanyakazi za maendeleo kwenye maeneo yao na kisha kulipwa ujira.

Akizungumza na Washiriki wa Mkutano huo Mkurugenzi Mtendaji wa Mfuko wa Maendeleo ya Jamii-TASAF,Bw. Ladislaus Mwamanga ametoa wito maalumu kwa wadau na maafisa wa Mfuko huo kufanya kazi kwa bidii na kuweka mbele maslahi ya taifa ili lengo la serikali la kuwapunguzia kero ya umaskini wananchi liweze kufikiwa kwa ufanisi.

Bwana Mwamanga amesema utekelezaji na mafanikio ya Mpango huo unategemea kwa kiwango kikubwa jitihada za pamoja hasa ikizingatiwa kuwa wananchi wanaolengwa ni wale ambao kwa kiwango kikubwa wamekuwa wakiishi katika hali ya umaskinina wengine kukata tamaa jambo ambalo amesema linapaswa kukabiliwa kwa nguvu za pamoja.

Kwa upande wake Kiongozi wa shughuli za TASAF katika Benki ya Dunia hapa nchini Bwana Mohamed Muderis amepongezea jitihada za dhati zinazofanywa na Watumishi wa TASAF na wadau wengine katika kuwahudumia Walengwa wa Mpango wa Kunusuru Kaya Maskini na hivyo kuleta hamasa ya dhati ya Walengwa kuuchukia umaskini.

Aidha Bwana Muderis ametoa rai kwa watumishi hao kuendelea na kukamilisha kwa wakati maandalizi ya sehemu ya pili ya Mpango wa kunusuru kaya maskini inayotarajiwa kuanza mapema mwakani na kuzingatia kwa dhati maelekezo ya serikali.

Mfuko wa Maendeleo ya Jamii –TASAF upo kwenye maandalizi ya sehemu ya pili ya Mpango wa kunusuru Kaya Maskini baada ya kukamilika kwa sehemu ya kwanza huku mkazo ukiwekwa kuwawezesha walengwa kushiriki katika kazi za Ajira ya Muda, kuunda vikundi vya kuweka akiba na kukopeshana,ujenzi wa miundombinu hasa katika sekta za elimu, afya ,maji na kuanzisha shughuli za uzalishaji mali ili kujiongezea kipato.

 pic1

Mkurugenzi Mtendaji wa TASAF ,Bw. Ladslaus Mwamanga (katikati) akiongoza mkutano wa Wadau wa Maendeleo, Maafisa wa Serikali na TASAF kwenye ukumbi wa Mfuko huo jijini Dar es Salaam.

 pic2

Picha ya juu na chini menejimenti ya TASAF na ile ya Benki ya Dunia hapa nchini wakiwa katika picha ya pamoja na baadhi ya Watumishi wa TASAF, Serikali Na Wadau wa Maendeleo baada kuhudhuria mkutano wao wa pamoja jijini Dar es Salaam.

pic3

pic4

Mmoja wa Watumishi wa TASAF,Shadrack Mziray akiwasilisha taarifa kwenye Mkutano wa Wadau ,serikali na TASAF jijini Dar es salaam.

pic5

Baadhi ya Washiriki wa Mkutano wa Wadau ,Serikali na TASAF wakiwa kwenye ukumbi wa Mikutano wa TASAF jijini DSM katika mkutano uliojadili utekelezaji wa Shughuli za Mfuko huo na maandalizi ya awamu ya pili ya Mpango huo inayotarajiwa kuanza hapo mwakani.