Serikali imeziagiza halmshauri zote nchini kuimarisha ufuatiliaji na usimamizi wa kaya zilizohitimu kutoka Mfuko wa Maendeleo ya Jamii Tanzania (TASAF), kwa lengo la kuhakikisha zinaendeleza mafanikio ya kiuchumi yaliyopatikana kwenye kaya zao

Maelekezo hayo yalitolewa Naibu Waziri wa Nchi, Ofisi ya Rais – Menejimenti ya Utumishi wa Umma na Utawala Bora, Mhe. Regina Qwaray, bungeni alipokuwa akijibu swali la msingi kutoka kwa Mbunge wa Viti Maalum, Mvita Ali, kuhusu namna wanufaika wanavyosaidiwa baada ya kuhitimu programu hiyo.

“Nazihimiza halmashauri zetu kuendelea kufuatilia kwa karibu kaya hizi ili ziendelee kuimarika na kunufaika na fursa zilizopo,” alisema Naibu Waziri.

Alisema pia mamlaka za serikali za mitaa zinapaswa kuziunganisha kaya hizo na fursa zilizopo katika maeneo yao, ikiwemo mikopo ya asilimia 10 inayotengwa kwa ajili ya vijana, wanawake na watu wenye ulemavu.

“Wanufaika hawaachwi peke yao baada ya kuhitimu, bali wanaendelea kupata mafunzo na ufuatiliaji wa karibu kutoka serikali za mitaa ili kuhakikisha wanafikia malengo waliyojiwekea wakati wa kushiriki katika programu,” alisema, Mhe. Qwaray. Aliongeza kuwa mkakati wa serikali ni kuwahamisha wanufaika kutoka utegemezi wa ruzuku kwenda kushiriki katika uchumi endelevu.

“Serikali itaendelea kuhakikisha kuwa wanufaika wanaohitimu baada ya kupokea ruzuku za uzalishaji wanaunganishwa na shughuli endelevu za kiuchumi kwa kuwaunganisha na mifumo ya kifedha, masoko na ujuzi wa ujasiriamali,” alisema Naibu Waziri.

Alisema mabadiliko hayo ni muhimu katika kuwageuza wanufaika wa zamani kuwa wajasiriamali wanaojitegemea wenye uwezo wa kuzalisha kipato na kuboresha maisha yao.

Katika swali la nyongeza, Mbunge Ali aliomba ufafanuzi kuhusu idadi ya wanawake waliohitimu kutoka programu hiyo na hali ya sasa ya kiuchumi ya wanufaika.

Mhe. Qwaray alisema tathmini ya hivi karibuni inaonyesha kuwa kaya 431,730 zimepata uwezo wa kujitegemea baada ya takribani miaka 10 ya mpango uliolenga kuwaondoa katika umaskini uliokithiri.

Alisema miongoni mwao kuna wanawake 757,730 ambao wamefanikiwa kuboresha hali zao za kiuchumi na kuwa tegemezi kwao wenyewe. Kwa mujibu wa Mhe. Qwaray, hali ya kiuchumi ya wanufaika kwa ujumla ni nzuri na inaendelea kuimarika kutokana na ufuatiliaji unaoendelea katika ngazi za chini.

“Hali ya kiuchumi ya wanufaika hawa ni nzuri na inaendelea kuboreka kwa kuwa wanafuatiliwa kwa karibu na viongozi wa vijiji na mitaa,” alisema.

Mhe. Qwaray alilihakikishia Bunge kuwa wengi wa waliotoka kwenye programu hiyo wanaendelea vizuri na wanadumisha mafanikio yao.

Akijibu swali la nyongeza kutoka kwa Mbunge wa Viti Maalum, Mhe. Neema Mwandabila, kuhusu hatua dhidi ya watu waliojiandikisha kwa udanganyifu katika TASAF, alisema utambuzi wa wanufaika hufanyika kwa ushirikishwaji wa jamii kupitia serikali za vijiji na mitaa.

Naibu Waziri alikiri kuwa kumekuwepo na baadhi ya watu wasio na sifa kuingizwa katika programu hiyo. Serikali, alisema, imekuwa ikifanya tathmini za mara kwa mara kubaini hali hizo.

“Pale inapobainika kuwa mtu hastahili, huondolewa mara moja kwenye programu,” alisema.

Mhe. Qwaray aliongeza kuwa hatua pia huchukuliwa dhidi ya maafisa wa ngazi ya kijiji na kata wanaohusika kuwaingiza watu wasio na sifa, hasa pale vitendo vya rushwa vinapothibitika.

Wakati huo huo, serikali iko katika hatua za mwisho za maandalizi ya kuzindua awamu ya tatu ya TASAF, ambayo inatarajiwa kushughulikia changamoto zilizobainika katika awamu ya pili na kuimarisha utekelezaji.

Akijibu swali la nyongeza kutoka kwa Mbunge wa Viti Maalum, Mhe. Mariam Mwinyi, Mhe. Qwaray alisema awamu hiyo iliyoboreshwa itazinduliwa hivi karibuni. Alisema awamu inayokuja imebuniwa kujenga juu ya mafunzo yaliyopatikana na kuongeza ufanisi wa programu katika kupunguza umaskini na kukuza maisha endelevu.