Mkurugenzi Mtendaji wa TASAF, Shedrack Mziray, anashiriki katika Mkutano Mkuu Maalum wa Jumuiya ya Tawala za Mitaa Tanzania (ALAT) unaofanyika katika Ukumbi wa Mikutano wa Kimataifa Arusha (AICC). Mkutano huo wa ngazi ya juu umewakutanisha viongozi wa Serikali, watunga sera pamoja na mamlaka za Serikali za Mitaa hufanya uchaguzi wa viongozi wake na kujadili vipaumbele muhimu vya maendeleo na kuimarisha utoaji wa huduma kwa wananchi nchini kote.

Mkutano huo umefunguliwa rasmi leo tarehe 22 Aprili 2026 na Mgeni Rasmi, Mhe. Dkt. Mwigulu Nchemba, ambaye alisisitiza umuhimu wa ushirikiano imara kati ya Serikali Kuu, Mamlaka za Serikali za Mitaa na taasisi za maendeleo katika kufanikisha maendeleo jumuishi ya Taifa kuelekea utekelezaji wa Dira ya Taifa 2050.

Alisema, “Wajibu wetu wa pamoja ni kuhakikisha kuwa mipango ya maendeleo inaleta maboresho halisi katika maisha ya wananchi, hususan makundi yaliyo katika mazingira magumu”.

Mkurugenzi Mtendaji wa TASAF Bw. Shedrack Mziray

Katika mkutano huo, Bw. Mziray anatarajiwa kutoa wasilisho fupi linaloeleza hali ya TASAF kwa sasa, likiangazia mafanikio yaliyopatikana kupitia Mpango wa Kunusuru Kaya Maskini Awamu ya Pili (PSSN II). Wasilisho hilo litaelezea pia namna TASAF inavyoendelea kuimarisha mifumo ya hifadhi ya jamii, kuwawezesha wananchi na kuchangia juhudi za kupunguza umaskini nchini.

Akizungumza kabla ya kuwasilisha mada yake, Bw. Mziray alisisitiza umuhimu wa kuendeleza ushirikiano endelevu, akisema, “TASAF itaendelea kushirikiana kwa karibu na Mamlaka za Serikali za Mitaa pamoja na wadau mbalimbali ili kupanua fursa kwa kaya zilizo katika mazingira hatarishi na kuhakikisha hakuna anayebaki nyuma katika safari ya maendeleo”.

Sambamba na vikao hivyo, TASAF imeandaa banda la maonesho katika eneo la mkutano, likionesha matokeo halisi ya utekelezaji wa PSSN II. Wanufaika wa mpango huo wanaonesha bidhaa mbalimbali walizozalisha kupitia shughuli za kujiongezea kipato, jambo linalothibitisha kuimarika kwa maisha yao na ongezeko la uwezo wa kiuchumi katika ngazi ya jamii.

Mmoja wa wanufaika, Bi. Khadija Salum, alieleza shukrani zake akisema, “Kupitia msaada wa TASAF, nimeweza kuanzisha biashara ndogo ambayo sasa inaiwezesha familia yangu kuishi kwa uhakika”.

Naye mshiriki mwingine, Rahabu Sibindi, aliongeza, “Mpango huu umetupatia matumaini na uwezo wa kupanga maisha yetu ya baadaye”. Kauli zao zinaakisi kwa upana mafanikio ya TASAF katika kubadilisha maisha ya Watanzania.